Ladı təşkil edən səslərin yüksəklik üzrə tonikadan sonrakı oktavanın tonikasına qədər düzülüşü ladın səs sırası və yaxud qamma adlanır.

Qərb musiqisində əsasən iki lad – major və minor ladları geniş yayıldığından tədrisdə də buna müvafiq olaraq major və minor qammalarından istifadə olunur. Major və minor qammalarının üç növü mövcuddur: - natural, harmonik, melodik.

Tədrisdə major qammasının yalnız natural növündən, minor qammasının isə natural, harmonik və melodik növlərindən istifadə edilir.

Arpedcio akkord səslərin ardıcıl səslənməsini bildirir və dalağavari, şaquli xəttlə işarə olunur.

Qamma və arpecioların öyrənilməsi şagirdlərdə ifaçılıq texnikasını inkişaf etdirməklə yanaşı, həm də hər hansı əsərin tonallığının təyin edilməsində, alterasiya işarələrinin mənimsənilməsində çox zəruri olan bir vasitədir.

Musiqi sistemində səs sırasının hər hansı pilləsindən major və minor ladlarını qurmaq olur. Belə olduqda ladın tonikasının (1- ci pillə) yerləşdiyi yüksəkliyə tonallıq deyilir.

Qamma və arpeciolar çalınarkən temp müəllim tərəfindən şagirdin hazırlıq səviyyəsinə uyğun müəyyən edilir.

1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14