Azərbaycan musiqi pedaqoji təcrübəsində ilk dəfə olaraq, sifahi–ənənəli musiqimizin ən qədim simli – mizrablı alətlərindən birinə – saz alətinə həsr olunmuş dərslik yaradılmışdır.

Saz aşıq musiqili – poetik yaradıcılığın ayrılmaz tərkib hissəsidir. Saz ifacılığı, onun əsrarəngiz akustik, melodik-intonasiya və hormonik xüsusiyyətləri qədim türk mifologiyasının poetik dünyasını, dastan qəhrəmanlarının obrazlarını təcəssüm etdirir.

Müasir dövrdə saz ifaçılığının professional tədrisi artıq bir zərurətə çevrilmişdir. Təqdirəlayiqdir ki, Azərbaycan Milli Konservatoriyasının rektoru, Xalq artisti Siyavuş Kərimi, «Musiqinin tarixi və nəzəriyyəsi» kafedrasının müdiri, sənətşünaslıq namizədi, dosent Akif Quliyev və «Milli musiqinin tarixi və nəzəriyyəsi» kafedrasının baş müəllimi Mübariz Əliyev bu məsuliyyətli işi öz üzərlərinə götürərək, belə bir dərslik hazırlamışlar. Burada saz alətinin əsrlərin dərinliyindən gələn ifacılıq üsulları və terminologiyası ardıcıl olaraq, ən əsası isə müasir anlamda sistemləşdirilmiş və onların təsnifatı verilmişdir. Həmçinin, dərslikdə not nümunələrinin öz əksini tapması da mühüm əhəmiyyətə malikdir: buraya həm ənənəvi aşıq havaları, həm də bəstəkar əsərləri daxil edilmişdir.

Faktiki olaraq, bu, aşıq musiqisi yaradıcılığının çoxəsrlik nailiyyətlərini əyani surətdə nümayiş etdirən, metodik cəhətdən istiqamətləndirən və qavranılmasına zəmin yaradan ilk fundamental dərslikdir.

Ümidvaram ki, gələcəkdə «Saz məktəbi» dərsliyi, həmçinin aşıq vokal ifaçılıq sənəti nümunələrini də əhatə edəcək müxtəlif aşıq məktəblərinin ifaçılıq üslubunu əks etdirmək üçün balaban alətinin daxil olunması və not nümunələrinin partitura şəklində yazılması kimi aktual məsələlərə diqqət yetiriləcək. Bu, əlbəttə ki, perspektivdə olan məsələlərdir, çünki aşıq yaradıcılığı kompleks yanaşma tələb edən, özündə musiqi, poeziya, teatr ünsürlərini qovuşduran saz – söz sənətidir.

Sənətşünaslıq doktoru, professor
Tariyel Məmmədov